I over fem tusen år har menneske stelt kystlandskapet for å skaffe seg mat i nært samspel med naturen. I lyngheiane ved havkanten har dei hatt sauer på beite, som gav både kjøt, mjølk, skinn og ull. “Den gammalnorske sauen er eineståande og har til alle tider gjeve oss så rike gåver at han fortener respekt og omsut. Ursauen er ikkje gammaldags, men ein sau for framtida,” skriv Hilde Buer i denne første boka om villsauen. Villsauboka gjev ei grundig framstilling av villsauen si kulturhistorie og fortel om villsauen sin plass i høve til andre sauerasar. Vi får høyre om kva som særpregar villsauen, og korleis ein kan få mest mogeleg ut av sauehaldet gjennom samspelet med dyra. Andre emne er stell av lyngheiane, lyngbrenning, avl, beiting og fôring, bruken av ulla, villsaugarden og sauehaldet i vid forstand. Villsauboka er både ei lærebok og ei oppslagsbok, men også ei bok til glede og inspirasjon. Boka byggjer på oppdatert kunnskap og forskingsresultat frå inn- og utland.